12. දසබ්‍රාහ‍්මණජාතකවණ‍්ණනා 495 අට‍්ඨකථා

12. දසබ්‍රාහ්මණ ජාතකය (495)

රාජා අවොච විධුරං යන මේ ගාථාව ශාස්තෘන් වහන්සේ ජේතවනයෙහි වාසය කරන සෙක් අසදෘශ දානය අරභයා දේශනා කළ සේක. එය අටවන නිපාතයෙහි ආදිත්ත ජාතකයෙහි විස්තර කරන ලද්දේමය. රජු එම දානය දෙන්නේ ශාස්තෘන් වහන්සේ ප්‍රධානකොට භික්ෂූන් පන්සියයක් තෝරා ගත්තේය. මහරහතුන් වහන්සේලාටම දුන්නේය. ඉක්බිති භික්‍ෂූහු ඔහුගේ ගුණ කියන්නෝ ඇවැත්නි, රජු අසදෘශ දානය දෙන්නේ තෝරා මහත්ඵල ඇති තන්හි දුන්නේ යයි දම්සභාවෙහි කථාවක් ඉපිදවූහ. ශාස්තෘෘන් වහන්සේ අවුත් මහණෙනි, දැන් කිනම් කථාවෙකින් හුන්නාහුදැයි විමසා මෙයින් යයි කී කල්හි මහණෙනි, යම් හෙයකින් මා වැනියෙකුගේ උපස්ථායකයෙකු වී තෝරා දන්දෙයි යන්න ආශ්චර්ය වූවක් නොවේ. පැරණි පණ්ඩිතයෝ බුදුන් නූපන් කල්හිද තෝරා දන් දුන්නාහු යයි කියා අතීත ප්‍රවෘත්තිය ගෙනහැර පා වදාළ සේක.

අතීතයෙහි කුරු රට ඉඳිපත් නුවර යුධීෂ්ටිර ගෝත්‍රයෙහි කෝරව්‍ය නම් රජු රාජ්‍යය කරවීය. විධුර නම් අමාත්‍යයා ඔහුට අර්ථයෙන්ද, ධර්මයෙන්ද අනුශාසනා කළේය. රජු සියළු දඹදිව කළඹමින් මහදන් දෙයි. එය ගෙන අනුභව කරන්නවුන් අතර පන්සිල් රක්නා වූ එකකුදු නැත. සියල්ලෝ දුස්සීලයෝමය. දානය රජු සතුටු කරවන්නේ නොවෙයි. රජු තෝරා දෙන දානය මහත් ඵලයයි සිල්වතුන්ට දෙනු කැමැත්තේ වී සිතුවේය. විධුර පණ්ඩිතයා සමග සාකච්ඡා කරන්නෙමියි උපස්ථාන පිණිස පැමිණි ඔහු අසුනෙහි හිඳුවා ප්‍රශ්නයක් විචාළේය. ඒ කරුණ දේශනා කරන්නා වූ ශාස්තෘෘන් වහන්සේ ගාථා අර්ධයක් දේශනා කළ සේක. පසුව රජුගේද විධුර ඇමතියාගේද වදන් පිළිවදන් වෙයි.

“රාජා අවොච විධුරං - ධම්මකාමො යුධිට්ඨිලො,

ධර්මය කැමති වූ යුධීෂ්ටිර රජු විධුර ඇමතියාට මෙසේ කීවේය.

බ්‍රාහ්මණෙ විධුර පරියෙස - සීලවන්තෙ බහුස්සුතෙ”

2. යමෙක් මගේ භෝජනය අනුභව කරන්නහුද, මෙවුන්දමින් තොර වූ (එවැන්නන් සොයව) යහළුව, යම් තැනක දෙන ලද්දේ මහත්ඵල වේද එහි දක්‍ෂිණාව දෙමු.

3. දේවයන් වහන්ස, යමෙක් ඔබගේ භෝජනය අනුභව කරත්ද (ඔවුන් අතර) මෙවුන්දමින් තොර වූ සිල්වත් බහුශ්‍රැත බ්‍රාහ්මණයෝ දුර්ලභයහ.

4. මහරජතුමනි, යම් ඒ බ්‍රාහ්මණ කුල දහයක් වෙයි. ඔවුන්ගේ කොටස් කිරීම් (මවිසින්) සොයන ලදී. විස්තර වශයෙන් අසව.

5. ඇතැම්හු මුදල් පිරවූ (අනතුරුව) කට බැඳි පසුම්බි ගෙන ඖෂධයන් ඔතා දෙති. නාවති. මන්ත්‍ර ජප කරති.

6. රජතුමනි, ඔවුහු වෙදුන් හා සමාන වෙති. ඔවුහුද බ්‍රාහ්මණයෝයි කියති. මහරජතුමනි, ඔවුහුද මා විසින් කියන ලදය. එවැනි බමුණන් වෙත ගොස් ආරාධනා කරමුද.

7. ඔවුහු බ්‍රාහ්මණ බැවින් ඉවත්වූහ. (මෙසේ කොරව්‍ය රජු කීවේය) ඔවුහු බ්‍රාහ්මණයෝ යයි කියනු නොලබත්. විධුරය, සිත් බහුශ්‍රැත වෙනත් බමුණන් සොයව.

8. යමෙක් මගේ භෝජනය අනුභව කරන්නහුද, මෙවුන්දමින් තොර වූ (එවැන්නන් සොයව) යහළුව, යම්තැනෙක්හි දෙන ලද්දේ මහත්ඵල වේද එහි දක්‍ෂිණාව දෙමු.

9. ඔවුහු කුඩා මිණිගෙඩි ගෙන රජ-මැති-ඇමතින් ඉදිරියේ ඝෝෂා කෙරෙත්. පණිවිඩ ගෙන යත්. රථ ශිල්ප ආදියෙහි හික්මවත්.

10. රජතුමනි, ඔවුහු සේවකයන් හා සමාන වෙති. ඔවුහුද බ්‍රාහ්මණයෝයි කියති. මහරජතුමනි, ඔවුහුද මා විසින් කියන ලදහ. එවැනි බමුණන් වෙත ගොස් ආරාධනා කරමුද?

11. ඔවුහු බ්‍රාහ්මණ බැවින් ඉවත් වූහ. (කොරව්‍ය රජු මෙසේ කීවේය) ඔවුහු බ්‍රාහ්මණයෝ යයි කියනු නොලබත්. විධුරය! වෙනත් සිල්වත් බහුශ්‍රැත බමුණන් සොයව.

12. යමෙක් මගේ භෝජනය අනුභව කරන්නාහුද මෙවුන්මින් තොර (එවැන්නන් සොයව) යහළුව, යම්තැනෙක්හි දෙන ලද්දේ මහත්ඵල වේද එහි දක්‍ෂිණාව දෙමු.

13. මහරජ, ඇතැම් බ්‍රාහ්මණයෝ කෙණ්ඩියක් හා වක් දණ්ඩක් ගෙන ගම්නියම් ගම්වලද රජුන් වෙතද එළඹෙත්. නුදුන් කල ගමෙහිද වනයෙහිද නොනැගිටිමුයි හිඳගනිති.

14. රජතුමනි, තමාට නිගාකර ගන්නවුන් හා සමාන ඔවුහුද බමුණෝයයි කියනු ලබත්. ඔවුහුද මා විසින් කියන ලදය එබඳු බමුණන් වෙත ගොස් ආරාධනා කරමුද?

15. ඔවුහු බමුණු බැවින් ඉවත් වූහයි කොරව්‍ය රජු කීය. ඔවුහු බමුණෝ යයි කියනු නොලබත්. විධුරය සිල්වත් බහුශ්‍රැත වෙනත් බමුණන් සොයව.

16. යමෙක් මාගේ භෝජනය අනුභව කරත්ද, මෙවුන්දම් සෙවීමෙන් වැළකුණු එවැන්නන් සොයව. යම්තැනකට දුන් දෙය මහත්ඵල වේද මිතුර (ඔවුන්ට) දක්‍ෂිණාව දෙමු.

17. බෙහෙවින් වැඩුන කිහිළි ලොම්, නිය, මැලියම් සහිත දත් ඇති දූවිලි සහිත හිස් ඇති දූවිලිවලින් ගැවසී ගත් ඒ බමුණෝ යදින්නාහු ගමන් කරති.

18. රජතුමනි, දැවී ගිය කනු උගුලන්නෝ මෙන් අපිරිසිදු වූවන් හා සමාන ඔවුහුද බමුණෝ යයි කියනු ලබත්. ඔවුහු යාචක බමුණෝ යයි කියනු ලබත්. ඔවුන් වෙත ගොස් ආරාධනා කරමුද?

19. ඔවුහු බමුණු බැවින් ඉවත් වූහයි කොරව්‍ය රජු කීය. ඔවුහු බ්‍රාහ්මණයෝ යැයි කියනු නොලබත්. විධුර පඬිතුමනි, සිල්වත් බහුශ්‍රැත වෙනත් බමුණන් සොයව.

20. යමෙක් මාගේ භෝජනය අනුභව කරත්ද, මෙවුන්දම් සෙවීමෙන් වැලකුණු එවැන්නන් සොයව. යම්තැනකට දුන් දෙය මහත්ඵල වේද යහළුව ඔවුන්ට දක්‍ෂිණාව දෙමු.

21. මහරජ, යමෙක් අරළු, නෙල්ලි, අඹ, දඹ, බුළු, දෙල්, දැහැටි බෙලි හා ඩෙබරද,

22. කිරිපළු උක් හා එම පැණිද දුම්කෝවද වී හා අඳුන්ද යන ලොකු කුඩා වෙළඳ බඩු විකුණත්ද,

23. මහරජ, වෙළඳුන් හා සමාන ඔවුහුද බ්‍රාහ්මණයෝයයි කියනු ලබත්. ඔවුහු වෙළඳ බමුණෝ යයි කියනු ලබත්. ඔවුන් වෙත ගොස් ආරාධනය කරමුද.

24. ඔවුහු බමුණු බැවින් ඉවත් වූහයි කොරව්‍ය රජු කීය. ඔවුහු බමුණෝ යයි කියනු නොලබති. විධුර පඬිතුමනි, සිත් බහුශ්‍රැත වෙනත් බමුණන් සොයව.

25. යමෙක් මාගේ භෝජනය අනුභව කරන්ද, මෙවුන්දම් සෙවීමෙන් වැලකුණු එවැන්නන් සොයව. යම් තැනක දුන් දෙය මහත්ඵල වේද යහළුව ඔවුන්ට දක්‍ෂිණාව දෙමු.

[missing trans]

[missing trans]

28. ඔවුහු බමුණු බැවින් ඉවත් වූහයි කොරව්‍ය රජු කීය. ඔවුහු බමුණෝ යයි කියනු නොලබත්. විධුර පඬිතුමනි, සිල්වත් බහුශ්‍රැත වෙනත් බමුණන් සොයව.

[missing trans]

30. ගම්වල පුරෝහිතයෝ වී නිරතුරුව භික්ෂාව ලබාගෙන අනුභව කරත්. බොහෝදෙනා සුභ නැකත් ආදිය ඔවුන්ගෙන් විමසත්. ගවයන්ගේ කෝෂ සිඳීම වෙර ලකුණු තැබීම ආදිය කරති.

31. ඔවුන් නිවෙස්වල මීමුන්, ඌරන්, එළුවන් මරති. මහරජතුමනි, ගවයන් හා සමාන හැසිරීම් ඇති ඔවුහුද බ්‍රාහ්මණයෝ යයි කියනු ලබත්. කියන ලද එවැනි බමුණන් වෙත ගොස් ආරාධනා කරමුද.

32. විධුර පඬිතුමනි, සිල්වත් බහුශ්‍රැත වෙනත් බමුණන් සොයව.

33. යමෙක් මගේ භෝජනය අනුභව කරත්ද, මෙවුන්දම් සෙවීමෙන් වැලකුණු එවැන්නන් සොයව. යම් තැනකට දුන් දෙය මහත්ඵල වේද යහළුව ඔවුන්ට දක්‍ෂිණාව දෙමු.

34. මහරජතුමනි, (ඇතැම්) බ්‍රාහ්මණයෝ කඩු පළිහ දරා කඩුව අතින් ගෙන වෙළඳ මාර්ගයන්හි සිටිත්. ගැල් (සොරුන් වෙසෙන තැනින්) තරණය කරවති.

35. ගව පාලකයන් ගම් පහරන සොරුන් හා සමාන ඔවුහුද බමුණෝ යයි කියනු ලබත්. මහරජතුමනි, කියන ලද ඔවුන් වෙත ගොස් ආරාධනය කරමුද?

36. ඔවුහු බමුණු බැවින් ඉවත් වූහයි කෝරව්‍ය රජු කීවේය. ඔවුහු බ්‍රාහ්මණයෝ යයි කියනු නොලබත්. විධුර පඬිතුමනි, සිල්වත් බහුශ්‍රැත වෙනත් බමුණන් සොයව.

37. යමෙක් මාගේ භෝජනය අනුභව කරන්ද, මෙවුන්දම් සෙවීමෙන් වැලකුණු එවැන්නන් සොයව. යම් තැනකට දුන් දෙය මහත්ඵල වේද, යහළුව ඔවුන්ට දක්‍ෂිණාව දෙමු.

38. ඇතැම්හු වනයෙහි කුටියක් කර (වසමින්) මලපුඩු කරවත් ගොයින්ගේ පටන් හාවුන් බළලුන් මසුන් කැස්බෑවන් පෙළත්.

39. මහරජතුමනි, ඔවුහු වැද්දෝය. (නමුත්) බමුණෝ යයි කියනු ලබත්. කියන ලද ඔවුන් වෙත ගොස් ආරාධනය කරමුද?

40. ඔවුහු බමුණු බැවින් ඉවත් වූහයි කෝරව්‍ය රජු කීවේය. ඔවුහු බ්‍රාහ්මණයෝ යයි කියනු නොලබත්. විධුර පණ්ඩිතයෙනි, සිල්වත් බහුශ්‍රැත වෙනත් බමුණන් සොයව.

41. යමෙක් මාගේ භෝජනය අනුභව කරත්ද, මෙවුන්දම් සෙවීමෙන් වැලකුණු එවැන්නන් සොයව. යම්තැනකට දුන් දෙය මහත්ඵල වේද, යහළුව ඔවුන්ට දක්‍ෂිණාව දෙමු.

42. අනිකෙක් ධනය කැමැත්තෝ ඇඳන් යට හොවිත් සෝම යාගය පැමිණි කල්හි රජවරු ඇඳ මත ස්නානය කරත්.

43. රජතුමනි, නාවන්නන් වැනි ඔවුහුද බමුණෝ යයි කියනු ලබත්. කියන ලද එබඳු බමුණන් වෙත ගොස් ආරාධනා කරමුද?

44. ඔවුහු බමුණු බැවින් ඉවත් වූහයි කෝරව්‍ය රජු කීවේය. ඔවුහු බ්‍රාහ්මණයෝ යයි කියනු නොලබත්. විධුර පණ්ඩිතයෙනි, සිල්වත් බහුශ්‍රැත වෙනත් බමුණන් සොයව.

45. යමෙක් මාගේ භෝජනය අනුභව කරන්නේ, මෙවුන්දම් සෙවීමෙන් වැළකුනු එවැන්නන් සොයව. යම්තැනකට දුන් දෙය මහත්ඵල වේද යහළුව, ඔවුන්ට දක්‍ෂිණාව දෙමු.

එහි සීලවන්තෙ යනු ආර්ය මාර්ගයෙන් පැමිණි සීලයෙහි පිහිටි බහුස්සුතෙ යනු මාර්ගඵලාවබෝධ වශයෙන් බහුශ්‍රැත වූ. යෙතෙ යනු යම් දැහැමි ශ්‍රමණ බ්‍රාහ්මණයෝ ඔබගේ දානය වළඳත් නම් එවැන්නෝ දුර්ලභයහ. බ්‍රාහ්මණ ජාතියො යනු බ්‍රාහ්මණ කුලයන්. තෙසංවිභංගං විචයං යනු ඒ බ්‍රාහ්මණයන්ගේ විස්තර මගේ නුවණින් රැස්කරන ලද බව විස්තර වශයෙන් අසව. සංවුතෙ යනු බඳිනා ලද කට ඇති. ඔසධීකායො ගන්‍ථෙන්ති. මෙය මේ රෝගයට බෙහෙතකි. මෙය මෙයටයැයි මෙසේ රෙදි කඩෙහි බැඳ මිනිසුන්ට දෙති. නහාපයන්ති නෑවීම කරත්. ජපන්ති යනු භූත විද්‍යාව පිරිවහත්. තිකිච්ඡකස්මා යනු වෙදුන් හා සමානය. තෙපි වුච්චන්ති යනු ඔවුහු බ්‍රාහ්මණයෝද අපි බ්‍රාහ්මණයෝදැයි නොදැන වෙදකමින් ජීවිකාව ගෙන යන්නාහු ව්‍යවහාරයෙන් බ්‍රාහ්මණයෝ යයි කියත්. අක්ඛාතා තෙ යනු මොවුහු මවිසින් වෙදබමුණෝ යයි කියන ලදහ. නිපතාමසෙ යනු දැන් කියව. කිම එවැනි බමුණන් වෙත එළඹෙමුද, ආරාධනය කිරීම පිණිස සමීපයට යමුද, මොවුන්ගෙන් ඔබට වැඩක් ඇත්දැයි විමසයි. බ්‍රහ්මඤ්ඤා යනු බ්‍රාහ්මණයාගේ ස්වභාවයෙන්. න තෙ මුච්චනති යනු ඔවුහු බහාතබන ලද පවු ඇති හෙයින් බමුණෝ නම් යයි නොකියත්.

කිංකිණිකායො යනු මහරජ, වෙනත් බ්‍රාහ්මණයෝ තමාගේ බ්‍රාහ්මණ ධර්මය හැර දිවිපැවැත්ම පිණිස රාජ-මහාමාත්‍ය ආදීන්ගේ ඉදිරියෙහි තාලංපට ගෙන වාදනය කරමින් ගායනා කරමින් යත්. පෙසනානීපි යනු දාස කම්කරුවන් මෙන් ලියුම් ගෙන යති. රථචරියාසු යනු රිය ශිල්පය උගන්වත්. පරිචාරක සමා දස් කම්කරුවන් හා සමානයහ. දණ්ඩං යනු වක් වූ ලී දණ්ඩක්. පච්චුපෙස්සන්ති රාජානො යනු රාජ රාජ මහාමාත්‍යයන් වෙත අවුත් ධනය සඳහා සේවනය කරත්. ගාමෙසු නිගමෙසු වා යනු ඔවුන් නිවෙස් දොරටුවෙහි හිඳිත්. නිග්ගාහක සමා යනු අවමන් කටයුතු අයබදු රැස්කරන රාජ පුරුෂයන් හා සමාන. ඔවුහු යම් සේ පුරුෂයන් නොගෙන නොයමුයි නිග්‍රහකොට ගනිත්මය. එසේම ගමෙහි හෝ වනයෙහි හෝ නොලබන ලද්දාහු මැරෙන්නෝ නමුදු නොනැගිටිමු යයි උපවාස කරත්. තෙපි යනු ඔවුහුද බදු රැස්කරන්නන් මෙන් පවිටු ස්වරූප ඇත්තෝ.

රජ රේණුහි යනු දූවිල්ලෙන් පස්වලින් ගැවසී ගත්. යාචකා ධනය ඉල්වන්නාහු ඛාණුසාතස්මා යනු කිළිටි සිරුරු ඇති හෙයින් දැවුන කෙත මැද ගස්ගල් නසන්නන් (උදුරන්නන්) විසින් බිම සාරා දැවුන කුඩා ගස් මුල් උදුරන මිනිසුන් හා සමාන වූවාහු. නොගෙන නොයමුයි නිසල භාවයෙහි සිටි හෙයින් සාරා තබන ලද කනුවක් මෙනැයි අර්ථයි. තෙපි යනු ඔවුහුද එසේ ලබන ලද ධනය වැඩීම පිණිස යොදා නැවත එසේම සිටි හෙයින් දුස්සීල බ්‍රාහ්මණයෝ.

උච්ඡුපුටං යනු උක්ද, උල්පැණිද. මධූ අඤ්ජනං යනු මීද, අඳුන්ද. උච්චාවෙචානි යනු බොහෝ අගනා වූ හා ටිකක් අගනා වූ. පණීයානි බඩු විපණෙන්ති විකුණත්. තෙපි යනු ඔවුහුද මෙපමණක් විකුණා දිවිපවත්වන්නා වූ වෙළඳ බ්‍රාහ්මණයෝය. පොසෙන්ති යනු පස්ගෝ රසයන් විකිණීමෙන් දිවියැපීම සඳහා පෝෂණය කරත්. පවෙච්ඡන්ති යනු තමාගේ දූවරුන් රන්රිදී ගෙන අනුන්ට දෙති. ඔවුහු මෙසේ අන්‍යයන්ට දෙන්නාහු විවාහ කරවති. තමාගේ පුතුන් සඳහා ගනු ලබන්නේ ආවාහය නම් වේ. අම්බට්ඨවෙසෙහි යනු කෙළෙඹියන් සමගද ගෘහපතීන් සමගද සමානයෝය. ඔවුහුද ව්‍යවහාර වශයෙන් බ්‍රාහ්මණයෝ යයි කියත්.

නික්ඛන්ත භික්ඛං යනු ගමෙහි පුරෝහිතයෝ වී තමා සඳහා නිරතුරු භික්‍ෂාව. බහුතෙ යනු බොහෝ ජනයන් ඒ පුරෝහිතයන්ගෙන් නැකැත් සුභමොහොත් මංගල්‍ය කරුණු විමසති. අණ්ඩච්ඡෙදා නිලඤ්ජකානි යනු වැටුප් ගෙන ගොනුන්ගේ අණ්ඩකෝෂ සිඳීමද, ත්‍රිශුල ආදී වෙරලකුණු තබන උපකරණයන්ගෙන් සළකුණු කරන්නෝ යන අර්ථයි. තත්‍ථ යනු ඒ ගම්පුරෝහිතයන්ගේ ගෙවල්වල මස් විකිණීම සඳහා මේ ගවයන් ආදීන් නසත්. තෙපි යනු ඔවුහු ගෝ ඝාතක බ්‍රාහ්මණයෝ යයි කියත්.

අසිචම්මං යනු කඩුමුගුරු ඊතල ඇතුන්ද. වෙස්සපථෙසු යනු වෙළඳුන් ගමන්කරන මාර්ගයන්හි. සත්‍ථං අබභාහයන්ති. ගැල්කරුවන් අතින් සියයක්ද දහසක්ද ගෙන ගැල් කණ්ඩායම් සොරුන් ඇති වනයෙන් එතර කරවයි. ගොපනිසාදෙහි යනු ගොපල්ලන් සමගද වැද්දන් සමගද ගම් නසන සොරුන් සමගද සමාන යයි කියන ලදී. තෙපි යනු මෙබන්දෝ ද බ්‍රාහ්මණයයි කියත්. කූටානිකාරයන්ති තෙ යනු බොරු ගෙවල් තනත්. සස බිළාරෙ යනු සාවුන්ද, බළලුන් දැයි මේ ක්‍රමයෙන් ගොඩ හැසිරෙන සතුන් දක්වයි. ආගොධො මච්ඡ කච්ඡපං යනු ගොඩ හැසිරෙන්නවුන් අතර ගොයින් පටන් ලොකු කුඩා ප්‍රාණීන් නසත් මරත් ජලජ සතුන් අතර මත්ස්‍ය කැසුබු ආදීන්. තෙපි යනු වැද්දන් හා සමාන වූ ඔවුහුද බ්‍රාහ්මණයෝයි කියත්.

අඤ්ඤෙධනස්සකාමාහි යනු සෙසු බ්‍රාහ්මණයෝ ධනය කැමැත්තෝ. හෙට්ඨා මඤ්චෙ පසක්ඛිතා යනු අපල දුරුකිරිමේ කටයුතු කරන්නෙමුයි රුවන්මුවා ඇඳක් කරවා ඒ යට හොත්තාහු වසත්. ඉක්බිති ඔවුන්ගේ සෝම යාගය එළඹි කල්හි රජවරු ඒ මත්තෙහි නහවත්. ඔවුහු යාගය නිම වූ කල්හි අවුත් ඒ ඇඳෙහි හිඳිත්. ඉක්බිතිව අනික් බ්‍රාහ්මණයෝ අපල දුරු කරන්නෙමුයි ඔවුන් නාවත්. රුවන්මුවා ඇඳ ද රජුගේ රාජාලංකාරද සියල්ල යට හොත්තහුටම වෙයි. තෙපි යනු ඒ කිළිටි පිරිමදින්නන් නැහැවියන් හා සමාන වූවාහු බමුණෝ යයි කියත්.

මෙසේ ව්‍යවහාර මාත්‍රයෙන් බ්‍රාහ්මණ වූ මොවුන් දක්වා පරමාර්ථ (ඇන්ත) වශයෙන් වූ බ්‍රාහ්මණයන් දක්වමින් ගාථා දෙකක් කීවේය.

46. දේවයන් වහන්ස, යම් කෙනෙක් ඔබගේ භෝජනය අනුභව කරන්ද, මෙවුන්දම් සෙවීමෙන් වැලකුණු සිල්වත් බහුශ්‍රැත බ්‍රාහ්මණයෝ ඇත්තාහ.

47. ඔවුහු එක් බතක් (වේලක්) අනුභව කරත්. මත්පැන් පානය නොකරති. මහරජතුමනි කියන ලද එබඳු වූවන් වෙත ගොස් ආරාධනය කරමුද?

එහි සීලවන්තා යනු ආර්ය ශීලයෙන් යුක්ත වූ. බහුස්සුතා යනු ධර්මාවබෝධය නම් වූ බහුශ්‍රැත බැවින් යුක්ත වූ. තාදිසෙ යනු මෙබඳු වූ බහාලන ලද පව් ඇති පසේ බුදුන් නම් බ්‍රාහ්මණයන්ට ආරාධනා කිරීම පිණිස වෙත එළඹෙමු යයි.

රජු ඔහුගේ කථාව අසා යහළු විධුර පණ්ඩිතයනි, දිය යුත්තන් අතර ශ්‍රේෂ්ඨ වූ මෙබඳු බ්‍රාහ්මණයෝ කොහි වසත්දැයි විචාළේය. මහරජතුමනි, උතුරු හිමවත නන්දමූලක පර්වතයෙහි යයි කීවේය. එසේ වී නම් ඔබගේ බලයෙන් මා සඳහා ඒ බ්‍රාහ්මණයන් සොයව යයි සතුටු සිතින් යුක්තව.

48. විධුර පඬිතුමනි, මුන්වහන්සේලා සිල්වත් බහුශ්‍රැත බ්‍රාහ්මණයෝ වෙති. විධුර පණ්ඩිතය, ඔවුන් වහා සොයව. උන්වහන්සේලාට ආරාධනා කරව යි යන ගාථාව කීවේය.

මහබෝසත් තෙමේ මැනවයි ඔහුගේ වචනය පිළිගෙන රජතුමනි, එසේ නම් නගරය අලංකාර කරවා සියලු නුවර වැස්සෝ දන් දී පෙහෙවස් අධිෂ්ඨාන කර සමාදන් වූ සිල් ඇත්තෝ වෙත්වායි බෙර හසුරුවා තෙපිද පිරිවර ජනයා සමග පෙහෙවස් සමාදන් වනු යයි කියා තෙමේ උදෑසනම අනුභව කර පෙහෙවස් සමාදන් වී සවස් කාලයෙහි දෑසමන් මල් පිරුණු කරඬුවක් ගෙන්වා රජු සමග පසඟ පිහිටුවා පසේ බුදුවරුන්ගේ ගුණ සිහිකර වැඳ උතුරු හිමවත නක්‍දමූල පර්වතවාසී වූ පන්සියයක් පසේබුදුවරු හෙට අපගේ දානය ගනිත්වායි ආරාධනා කර මල් අටමිටක් අහසෙහි විසුරුවාලීය. එකල්හි එහි පන්සියයක් පසේ බුදුවරු වසත්. මල් ගොස් ඔවුන්ගේ මත්තෙහි වැටුනාහුය. ඔවුහු සිතා බලන්නාහු ඒ කරුණ දැන පිංවතුනි, විධුර පණ්ඩිතයා විසින් ආරාධනය කරන ලද්දෝ වෙමු. මෙතෙම අවශේෂ සත්ත්වයෙකු නොවේ. මෙතෙම බුද්ධංකුරයෙකි. හෙතෙම මේ කල්පයෙහි බුදුවන්නෙහි. ඔහුට සංග්‍රහ කරමු යයි ආරාධනාව ඉවසූහ. මහබෝසත් තෙමේ මල් නොපැමිණීමේ සළකුණින් ආරාධනාව ඉවසූ බව දැන මහරජතුමනි, හෙට පසේබුදුවරු පැමිණෙති. සත්කාර සම්මාන කරවයි කීවේය. රජු දෙවන දවස්හි මහත් වූ සත්කාර කර මතුමහලෙහි ඉතා වටිනා වූ අසුන් පැනවීය. අනෝතත්ත විලෙහි කරන ලද සිරුරු පිළිදැගුම් ඇති පසේ බුදුවරු වේලාව සලකා අහසින් අවුත් රජමිදුලෙහි බැස්සාහුය. රජුද බෝධිසත්ත්වයෝද පැහැදුන සිත් ඇත්තාහු උන්වහන්සේලාගේ අතින් පාත්‍ර ගෙන පහයට නංවා හිඳුවා දක්‍ෂිණෝදකය දී (පැන් පිළිගන්වා) ප්‍රණීත වූ කෑ යුතු දෙයින්ද අනුභව කළයුතු දෙයින්ද උපස්ථාන කළාහුය. බක්කිය අවසානයෙහිදීම දෙවන දවස සඳහාදැයි මෙසේ සත්දිනක් ආරාධනා කර මහදන් දී සත්වන දිනයෙහි සියළු පිරිකර දුන්හ. ඔවුහු අනුමෝදන් කර අහසින් එහිම ගියාහුය. පිරිකරද උන්වහන්සේලා සමගම ගියාහුය.

ශාස්තෘන් වහන්සේ මේ ධර්මදේශනාව ගෙනහැර දක්වා කොසොල් රජු මගේ උපස්ථායකයෙකු වී තෝරා දන් දීමට යොමු වීම පුදුමයට කරුණු නොවේ. පැරණි පණ්ඩිතයෝ බුදුන් නූපන් කල්හිම එලෙස දුන්නාහු යයි වදාරා ජාතකය ගලපා වදාළ සේක. එකල්හි රජු ආනන්ද වීය. විධුර පණ්ඩිතයා මම ම වීමි යයි වදාළ සේක.