ඝරාවාසපඤ‍්හො
5593. විධුර වසමානස‍්ස ගහට‍්ඨස‍්ස සකං ඝරං, ඛෙමා වුත‍්ති කථං අස‍්ස කථන‍්නු අස‍්ස සඞ‍්ගහො,
5593. (රජ) විධුර පණ්ඩිතයනි, සිය නිවෙසෙහි වෙසෙන ගිහියාට (තම) ආරක්‍ෂාව කෙසේ වන්නේ ද? (චතුර්විධ) සංග්‍රහය කෙසේ වේ ද?
5594. අව්‍යාපජ‍්ඣං කථං අස‍්ස සච‍්චවාදී ච මාණවො, අස‍්මා ලොකා පරං ලොකං කථං පෙච‍්ච න සොචති.
5594. කෙසේ නිදුක් වේ ද? කෙසේ සත්‍යවාදී වේ ද? කෙසේ මෙලොවින් පරලොව ගොස් ශෝක නො කෙරේ ද?
5595. තං තත්‍ථ ගතිමා ධිතිමා මතිමා අත්‍ථදස‍්සිමා, සඞ‍්ඛාතා සබ‍්බධම‍්මානං විධුරො එතදබ්‍රවි:
5595. දම්සෙබෙහි ඤාණගති ඇති, ධෛර්‍ය්‍යය ඇති, විපුල ප්‍රඥා ඇති, සූක්‍ෂම අර්‍ත්‍ථ දන්නා නුවණ ඇති හැම දහම් පිරිසිඳ දන්නා නුවණ ඇති විධුර පඬිතෙමේ රජුහට මෙය කී ය:
5596. න සාධාරණදාරස‍්ස න භුඤ‍්ජෙ සාදුමෙකකො, න සෙවෙ ලොකායතිකං නෙතං පඤ‍්ඤාය වද‍්ධනං.
5596. අනුන් අයත් බිරියන් හා වැරැදි හැසිරීම නො කටයුතු. රසවත් අහර තනිව රස නො විඳියයුතු. ඥාන වර්ධනයට හේතු නොවන ලෝකායත ශාස්ත්‍රය නො සෙවියයුතු.
5597. සීලවා වත‍්තසම‍්පන‍්නො අප‍්පමත‍්තො විචක‍්ඛණො, නිවාතවුත‍්ති අත්‍ථද‍්ධො සුරතො සඛිලො මුදු.
5597. සිල්වත් වීම ය වත්සපන් වීම ය කුසල්දහම්හි අප්‍රමාද වීම ය තියුණු නුවණැති වීම ය යටත් පැවැත්ම ය මසුරු නො වීම ය සුවච බව ය මිහිරි කථාව ය මොළොක් බව ය (යන මේ ගති) ඇත්තෙක් වන්නේ ය.
5598. සඞ‍්ගහෙතා ච මිත‍්තානං සංවිභාගී විධානවා, තප‍්පෙය්‍ය අන‍්නපානෙන සදා සමණබ්‍රාහ‍්මණෙ.
5598. මිතුරනට සංග්‍රහ කරන්නේ දුගී මගී ආදීන්ට බෙදා දී වළඳනුයේ කටයුතු සංවිධාන කරනුයේ හැම කල්හි මහණ බමුණන් ආහාරපානයෙන් සතුටු කරන්නේ යැ.
5599. ධම‍්මකාමො සුතාධාරො භවෙය්‍ය පරිපුච‍්ඡකො, සක‍්කච‍්චං පයිරුපාසෙය්‍ය සීලවන‍්තෙ බහුස‍්සුතෙ.
5599. දහම් කැමැතිවීම ය දැනීම දියුණු කිරීම සඳහා මහණ බමුණන්ගෙන් පිළිවිසීම (ප්‍රශ්න කිරීම) සිල්වතුන් හා උගතුන් ගෞරව පූර්‍වකව ඇසුරු කිරීම ය (යන මේ කටයුතු) කරන්නේ ය.
5600. ඝරමාවසමානස‍්ස ගහට‍්ඨස‍්ස සකං ඝරං, ඛෙමා වුත‍්ති සියා එවං එවන‍්නු අස‍්ස සඞ‍්ගහො.
5600. සිය නිවසෙහි වෙසෙන ගිහියාගේ ආරක්‍ෂා සහිත පැවැත්ම මෙසේ යැ. ඔහුගේ චතුර්විධ සංග්‍රහය ද මෙසේ වන්නේ ය.
5601. අව්‍යාපජ‍්ඣො සියා එවං සච‍්චචවාදී ච මාණවො, අස‍්මා ලොකා පරං ලොකං එවං පෙච‍්ච න සොචති.
5601. සත්‍යවාදී මාණවක තෙම මෙසේ (පිළිපැදීම නිසා) ව්‍යාබාධ රහිත වන්නේ ය. මෙලොවින් පරලොවට ගොස් පරලොව දී ශෝක නො කරන්නේ යි.