කප‍්පසුත‍්තං
5. 10.
5. 10.
කප‍්පසුත‍්තං
කප්පමාණවක පෘච්ඡා
1097. මජ‍්ඣෙ සරස‍්මිං තිට‍්ඨතං (ඉච‍්චායස‍්මා කප‍්පො.) ඔඝෙ ජාතෙ මහබ‍්භයෙ, ජරාමච‍්චුපරෙතානං දීපං පබ්‍රූහි මාරිස; ත්‍වඤ‍්ච මෙ දීපමක‍්ඛාහි යථායිදං නාපරා සියා
1097. (ආයුෂ්මත් කප්පමාණවක මෙසේ විචාරයි:) නිදුකානන් වහන්ස, (පූර්‍ව - අපර කොටීන් නො පැණෙන හෙයින්) මධ්‍යවූ සංසාරයෙහි සිටුනා වූ ජරායෙන් හා මරණයෙන් හා මඩනාලද්දවුනට ජාත්‍යාදි මහද්භය ඇති (කාමාදි) ඕඝය උපන් කල්හි ප්‍රතිෂ්ඨාව වදාළ මැනැවි. යම් පරිද්දෙකින් යලි මෙ දුක නො වන්නේ ද, එපරිද්දෙන් මට ප්‍රතිෂ්ඨාව ද වදාළ මැනැවි.
1098. මජ‍්ඣෙ සරස‍්මිං තිට‍්ඨතං (කප‍්පාති භගවා) ඔඝෙ ජාතෙ මහබ‍්භයෙ, ජරාමච‍්චුපරෙතානං දීපං පබ්‍රූමි කප‍්ප තෙ.
1098. (භාග්‍යවතුන් වහන්සේ මෙසේ වදාළසේක: කප්පමාණවයෙනි,) මධ්‍ය වූ සංසාරයෙහි සිටුනා වූ ජරායෙන් හා මරණයෙන් හා මඩනාලද්දවුනට (ජාත්‍යාදි) මහද්භය ඇති (කාමාදි) ඕඝය උපන් කල්හි කප්පය, තොපට ප්‍රතිෂ්ඨාව දෙසමි.
1099. අකිඤ‍්චනං අනාදානං එතං දීපං අනාපරං, නිබ‍්බානමිති තං බ්‍රූමි ජරාමච‍්චුපරික‍්ඛයං.
1099. ප්‍රතිභාග වූ අපර ප්‍රතිෂ්ඨා රහිත වූ තෙල ප්‍රතිෂ්ඨාව රාගාදි කිඤ්චන රහිතය. තෘෂ්ණාදාන රහිත ය. ජරාමරණව්‍යපශමය වූ එය නිර්‍වාණ යයි කියමි.
1100. එතදඤ‍්ඤාය යෙ සතා දිට‍්ඨධම‍්මාභිනිබ‍්බුතා, න තෙ මාරවසානුගා න තෙ මාරස‍්ස පද‍්ධගූති.
1100. ස්මෘතිමත් වූ (අනිත්‍යාදි විසින්) දක්නාලද ධර්‍ම ඇති යම් රහත්හු තෙල නිර්‍වාණය දැන ක්ලේශපරිනිර්‍වාණයෙන් පිරිනිවියාහු වෙද්ද, ඔහු මාරවශයට ගියාහු නො වෙති. ඔහු මාරයාගේ මඟ යන්නාහු (පරිවාරකයෝ) නො වෙති යි.
කප‍්පසුත‍්තං දසමං.
කප්පමාණවක පෘච්ඡා නිමි